Аскания-Нова (укр. Асканія-Нова) - Украинаның оңтүстігіндегі мемлекеттік қорық (1828 ж. ұйымдастырылған). Херсон облысындағы Каховка қаласынан оңтүстік-шығыста 60 км қашықтықта, Аскания-Нова елді мекенінде орналасқан. Далалық өңіріндегі тың жерде жануарлар мен өсімдіктің табиғи жағдайын сақтай отырып, зерттеу жұмысын жүргізу үшін құрылған.
Аскания-Новаға тиісті жер 333,08 км², соның ішінде 110,54 км² жерді қорық алып жатыр. Қорықтың негізінде 1932 ж. жануарларды жерсіндіру және оларды өзара будандастыру ісімен шұғылданатын Бүкілодақтық ғылыми-зерттеу институты құрылған еді. Ол 1956 жылы Украинаның М.Ф.Иванов атындағы далалық өңірдегі мал шаруашылық ғылыми-зерттеу институтына айналдырылды.
Аскания-Нованың зоологиялық бөлімінде дүниенің түкпір-түкпірінен әкелінгентағы жануарлар (бизон, зубр, зебр, лама , Пржевальский жылқысы, құстардан Африка түйеқұсы, нанду, аққу, тырна т.б.) өсіп-өнеді.
Ботаника бағында ағаш пен бұтаның 120-ға жуық түрін Оңтүстіктің қуаншылық жағдайына бейімдеп өсіру жұмыстары жүргізіледі.