Үлкен тосқауыл рифі (ағылш. Great Barrier Reef) — Австралияның солтүстік-шығыс жағалауын бойлай орналасқан Маржанды теңізіндегі маржан аралдары мен рифтер тізбектері.
Ұзындығы шамамен 2300 км. Рифтің ені солтүстік бөлігінде 2 км, оңтүстігінде 150 км. Көпшілігі су астында орналасқан, теңіз деңгейі қайтқан кезде ғана көрінеді. Үлкен тосқауыл рифі мен құрлық жағалауы аралығында тереңдігі 50 м-ден аспайтын, теңіз толқындарынан тосқауыл рифпен бөлінген, кеме жүзуге пайдаланатын “Ішкі канал” бар.
Үлкен тосқауыл рифіндегі кеме өтуге қолайлы 20 өткелдің бастылары: Үлкен Солтүстік-Шығыс, Рейн-Айленд, Кук, Тринити.
1979 жылы ауданы 5 млн га болатын Теңіз ұлттық саябағы құрылды; өсімдігі мен жануарлар дүниесі қорғалады.